កិច្ចការអភិរក្ស

ការងារថែរក្សាឯកសារ

សារមន្ទីរ មាន​ឯកសារ​ដើម​បន្សល់​ពី​សម័យ​ខ្មែរ​ក្រហម​ជា​ច្រើន​ម៉ឺន​ច្បាប់ ហើយ​ឯកសារ​ទាំង​នោះ​រាប់​បញ្ចូល​ទាំង ចម្លើយ​សារភាព​ដោយ​បង្ខំ ហ្វីល​រូបថត ប្រវត្តិរូប​សង្ខេប​របស់​អ្នកទោស​និង​បុគ្គលិក​មន្ទីរ​ឃុំ​ឃាំង កំណត់​ហេតុ​របស់​កម្មាភិបាល​ និង​សៀវភៅ​កំណត់​ហេតុ ព្រម​ទាំង​ឯកសារ​ផ្សេងៗ​​ទៀត​។

មន្ត្រី​សារមន្ទីរ បាន​អនុវត្ត​ការងារ​ថែរក្សា​នេះ​ដោយ​មាន​ការ​ចូល​រួម​ពី​អ្នក​ជំនាញ​បរទេស និង ស្ថាប័ន​ផ្សេងៗ​មួយ​ចំនួន​ដូចជា​៖ ឆ្នាំ១៩៩២ សហការ​ជាមួយ​សកល​វិទ្យាល័យ Cornell ឆ្នាំ១៩៩៤សហការ​ជាមួយ​បណ្ណសារ​ជាតិ​សហរដ្ឋ​អាមេរិក និង​ឆ្នាំ១៩៩៥ សហការ​ជាមួយ​មជ្ឈមណ្ឌល​ឯកសារ​កម្ពុជា​។ នៅ​ឆ្នាំ​២០០៩ បន្ទាប់​ពី​បំពេញ​វគ្គ​បណ្តុះ​បណ្តាល​ពី​ប្រទេស​ជប៉ុន មន្ត្រី​ផ្នែក​បណ្ណសារ​បាន​នាំ​យក​ប្រអប់​គ្មាន​ជាតិ​អាស៊ីត ដើម្បី​ទុក​ដាក់​ថែរក្សា​ក្រដាស​ឯកសារ​ដ៏​មាន​តម្លៃ​ឲ្យ​នៅ​បាន​យូរ​អង្វែង​។

បណ្ណសារ​សារមន្ទីរ​ឧក្រិដ្ឋកម្ម​ប្រល័យ​ពូជ​សាសន៍​ទួលស្លែង បាន​ចុះ​ក្នុង​បញ្ជី​ស្មារតី​ចង​ចាំ​នៃ​ពិភព​លោក​របស់​អង្គការ​យូណេស្កូ​។ បច្ចុប្បន្ន ភ្នាក់ងារ​កិច្ច​សហប្រតិបត្តិ​កូរ៉េ​ KOICA ​តាមរយៈ​អង្គការ​យូណេស្កូ បាន​ជួយ​គាំ​ទ្រ​គម្រោង​ថត​ចម្លង (digitization) រាល់​ឯកសារ​ដែល​មាន​នៅ​ក្នុង​បណ្ណសារដ្ឋាន​របស់​សារមន្ទីរ និង​ការ​បង្កើត​ប្រព័ន្ធ​គ្រប់​គ្រងទិន្នន័យ ដើម្បី​ងាយ​ស្រួល​ក្នុង​ការ​ស្រាវជ្រាវ​។

ព័ត៌មាន​បន្ថែម សូម​ចូល​ទៅ​កាន់​ទំព័រ​បណ្ណសារ

ព័ត៌មានលំអិតសូមចុចលើរូបថត