សារមន្ទីរឧក្រិដ្ឋកម្មប្រល័យពូជសាសន៍ទួលស្លែងប្តេជ្ញាលើកកម្ពស់ការយល់ដឹងពីប្រវត្តិសាស្ត្រខ្មែរក្រហម។ សារមន្ទីរមានគោលបំណងជម្រុញឲ្យយុវជនជំនាន់ក្រោយរួមគ្នាបង្ការមិនឲ្យរបបឧក្រិដ្ឋកម្មកើតឡើងជាថ្មីម្តងទៀតក្នុងប្រទេសកម្ពុជា និងលើសកលលោក។ ដើម្បីសម្រេចគោលបំណងនេះ សារមន្ទីរផ្តួចផ្តើមបង្កើតក្រុមអប់រំផ្សព្វផ្សាយនៅឆ្នាំ២០០៩ ហើយបានពង្រីកសកម្មភាពនិងកម្មវិធីនៅឆ្នាំ២០១៤ រួមមាន៖ ការផ្សព្វផ្សាយក្នុងសារមន្ទីរ ការចុះផ្សព្វផ្សាយតាមសាលារៀន និងការបង្កើតវគ្គបណ្តុះបណ្តាលលើកកម្ពស់សមត្ថភាពក្រុមការងារ។
១. កម្មវីធីក្នុងសារមន្ទីរ
សាធារណជន អាចចូលរួមក្នុងសកម្មភាពមួយចំនួនដែលរៀបចំដោយសារមន្ទីរអំឡុងពេលទស្សនា ហើយកម្មវិធីទាំងនោះរួមមាន៖
ផ្កាឈូក ជាសញ្ញាដែលតំណាងឲ្យសន្ដិភាពក្នុងវប្បធម៌ខ្មែរ។ សារមន្ទីររៀបចំបន្ទប់ផ្កាឈូកនេះឡើងនៅឆ្នាំ២០១៥ សម្រាប់ជាកន្លែងឲ្យភ្ញៀវទេសចរអាចចំណាយពេលវេលាធ្វើការឆ្លុះបញ្ចាំង ឬតាំងសមាធិ ដើម្បីសម្រួលអារម្មណ៍តានតឹងក្រោយពីទស្សនាពិព័រណ៍។ សារមន្ទីររៀបចំបន្ទប់នេះដោយបំពាក់ម៉ាស៊ីនត្រជាក់ កន្ទេលកក់ ខ្នើយដែលអាចឲ្យភ្ញៀវទេសចរមានភាពងាយស្រួលអំឡុងពេលសម្រាក និងរៀបចំឲ្យមានការសម្ដែង២ដងក្នុងមួយថ្ងៃ គឺការលេងភ្លេងប្រពៃណីជាតិខ្មែរជាមួយឧបករណ៍តន្ត្រីបុរាណ និងការស្មូត្រ។
- បន្ទប់សកម្មភាព – ការទស្សនាសារមន្ទីរ
សារមន្ទីរបង្កើតបន្ទប់សកម្មភាពនេះនាឆ្នាំ២០១៥ ក្នុងបំណងឲ្យសិស្សានុសិស្សកម្រឹតអនុវិទ្យាល័យ និងវិទ្យាល័យសិក្សាស្វែងយល់បន្ថែមដើម្បីបង្កើនចំណេះដឹងទាក់ទងនឹងព្រឹត្តិការណ៍ដែលកើតឡើងក្នុងសម័យខ្មែរក្រហម។ សិស្សានុសិស្ស អាចយល់ដឹងកាន់តែច្បាស់ពីពិព័រណ៍នៅក្នុងសារមន្ទីរតាមរយៈការស្រាវជ្រាវ និងសកម្មភាពគួរឲ្យទាក់ទាញមួយចំនួនទៀត។ សកម្មភាពមួយចំនួនបានលើកទឹកចិត្ដសិស្សានុសិស្ស ឲ្យធ្វើបទសម្ភាសន៍សមាជិកគ្រួសារអំពីស្ថានភាពរស់នៅក្នុងសម័យខ្មែរក្រហម ដើម្បីបងើ្កតឲ្យមានការសន្ទនានិងការយល់ដឹងរវាងមនុស្សជំនាន់មុននិងជំនាន់ក្រោយ។ សារមន្ទីរស្នើឲ្យមានការជូនដំណឹងជាមុនពីសាលានានាដែលចាប់អារម្មណ៍ប្រើប្រាស់បន្ទប់សកម្មភាព ដើម្បីឲ្យក្រុមការងារមានភាពងាយស្រួលក្នុងការរៀបចំសម្រាប់បំបេញតម្រូវការសិស្សានុសិស្ស។
- ការផ្ដល់សក្ខីកម្មអំពីសម័យខ្មែរក្រហម
នៅឆ្នាំ២០១៥ សារមន្ទីរបង្កើតកម្មវិធីនេះឡើងក្នុងបំណងផ្តល់ឱកាសដល់ជនរងគ្រោះមានជីវិតពីមន្ទីរស‑២១ ដើម្បីចែករំលែកបទពិសោធន៍ជីវិតក្នុងអតីតគុកនេះទៅកាន់សាធារណជន។ ក្រោយមកនៅឆ្នាំ២០១៦ សារមន្ទីរពង្រីកកម្មវិធីនេះ ដើម្បីផ្តល់ឱកាសដល់ជនរងគ្រោះមានជីវិតពីសម័យខ្មែរក្រហមដទៃទៀតដែលមានបំណងចែករំលែកបទពិសោធន៍ជីវិតកុមារភាពក្នុងសម័យនោះ។ កម្មវិធីនេះមានឈ្មោះថា “សក្ខីកម្មស្តីពីព្រឹត្តិការណ៍សោកសៅក្នុងសម័យខ្មែរក្រហមតាមរយៈកុមារ និងជំទង់”។
ក្រុមគោលដៅចម្បងរបស់ក្រុមអប់រំផ្សព្វផ្សាយគឺសិស្សអនុវិទ្យាល័យ។ ក្រុមអប់រំផ្សព្វផ្សាយបានរៀបចំតាក់តែងសៀវភៅណែនាំសកម្មភាពនេះឡើង ដោយសារតែមើលឃើញពីភាពខ្វះខាតព័ត៌មាន និងឯកសារសម្រាប់សិស្សានុសិស្សអំឡុងពេលទស្សនាសារមន្ទីរ។ សៀវភៅនេះផ្ដល់ព័ត៌មានសមស្របទៅតាមអាយុរបស់សិស្សអំពីពិព័រណ៍នៅក្នុងសារមន្ទីរ ក៏ដូចជាសកម្មភាពអប់រំដើម្បីផ្សព្វផ្សាយឲ្យមានការយល់ដឹងបន្ថែមពីមន្ទីរស-២១ និងដំណាក់កាលដំបូងនៃការបង្កើតសារមន្ទីរប្រល័យពូជសាសន៍ទួលស្លែង។ គំនិតផ្ដួចផ្ដើមដំបូងនៃការបង្កើតសៀវភៅនេះគឺស្ថិតក្រោមកិច្ចសហប្រតិបត្ដិការរវាងសារមន្ទីរវិចិត្រសិល្បៈ ខេត្ដអូគឺណាវ៉ានិងសារមន្ទីរសន្តិភាពខេត្ដអូគឺណាវ៉ា និងសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។
- ការធ្វើបទបង្ហាញ និងបាឋកថា
សារមន្ទីររៀបចំបទបង្ហាញចំនួនពីរជូនអ្នកទស្សនា។
បទបង្ហាញដល់សិស្ស សារមន្ទីររៀបចំការធ្វើបទបង្ហាញខ្លីនេះសម្រាប់សិស្សានុសិស្សដែលមកទស្សនាជាក្រុម។ ក្រុមការងារនឹងធ្វើបទបង្ហាញខ្លីមួយដែលមានរយៈពេល២០នាទីអំពីសារមន្ទីរមុននឹងការទស្សនាពិព័រណ៍។ តាមរយៈការស្នើសុំឬណាត់ទុកជាមុន ក្រុមការងារអប់រំផ្សព្វផ្សាយងាយស្រួលក្នុងការរៀបចំប្រធានបទទៅតាមតម្រូវការរបស់ក្រុមដែលមកទស្សនា។ ការធ្វើបទបង្ហាញនេះ មានការពេញនិយមចំពោះសាលារៀន សាកលវិទ្យាល័យ អង្គការក្រៅរដ្ឋាភិបាល ស្ថាប័នរដ្ឋាភិបាល និងគ្រឹះស្ថានសិក្សាផ្សេងៗទៀត។ សម្រាប់ព័ត៌មានបន្ថែមសូមទាក់ទងសារមន្ទីរ។
បាឋកថាសាធារណៈ កម្មវិធីនេះចាប់ដំណើរការនៅឆ្នាំ២០១៦ ដោយមានអ្នកស្រាវជ្រាវជាតិ ធ្វើបទបង្ហាញជាបន្តបន្ទាប់អំពីប្រវត្តិសាស្រ្តកម្ពុជាចាប់ពីសម័យអាណានិគមនិយមបារាំងរហូតបច្ចុប្បន្ន។ បាឋកថានេះមានរយៈពេល៦០នាទី ដោយ៤០នាទីសម្រាប់ធ្វើបទបង្ហាញ និង២០នាទីទៀតសម្រាប់សំណួរចម្លើយ។ កម្មវិធីនេះ បើកជូនសាធារណជនចូលរួមដោយសេរី និងមានបកប្រែភាសាអង់គ្លេសប្រសិនករណីចាំបាច់។
សាធារណជនដែលមានគម្រោងទស្សនាជាក្រុមអាចទាក់ទងមកសារមន្ទីរណាត់ជួបមគ្គុទេសក៍ជាមុន ដើម្បីឲ្យស្របទៅតាមការចាប់អារម្មណ៍និងប្រភេទអាយុរបស់ក្រុម។
២. កម្មវិធីចុះអប់រំផ្សព្វផ្សាយ
សារមន្ទីររៀបចំកម្មវិធីនេះ ដើម្បីចុះបង្ហាត់បង្ហាញសិស្សតាមសាលានានាក្នុងក្រុងភ្នំពេញ។ យុទ្ធសាស្ត្ររបស់ក្រុមអប់រំផ្សព្វផ្សាយ គឺផ្តោតលើការសិក្សានិងការអនុវត្តន៍ដោយរួមបញ្ចូលទាំងការស្រាវជ្រាវ ការសម្ភាសន៍ ការធ្វើបទបង្ហាញ និងការអនុវត្តន៍ការងារតាមក្រុម។ គោលបំណងនៃការអនុវត្តន៍គម្រោងគឺលើកកម្ពស់ការយល់ដឹងអំពីប្រវត្តិសាស្រ្តខ្មែរក្រហម និងសារសំខាន់ពីការអភិរក្សសារមន្ទីរឧក្រិដ្ឋកម្មប្រល័យពូជសាសន៍ទួលស្លែងក្នុងស្រទាប់យុវសិស្ស។ លើសពីនេះទៀតសារមន្ទីរសង្ឃឹមថាអាចនឹងលើកទឹកចិត្តសិស្សឲ្យក្លាយជាអ្នកនាំសារសន្តិភាព ដើម្បីការពារកុំឲ្យអំពើឃោរឃៅនេះកើតមានសារជាថ្មី។
សប្តាហ៍ទី១ ក្រុមអប់រំផ្សព្វផ្សាយនឹងចុះធ្វើបទបង្ហាញព័ត៌មានទូទៅអំពីប្រវត្តិសាស្រ្តប្រទេសកម្ពុជានៅតាមសាលាគោលដៅ។
សប្តាហ៍ទី២ ក្រុមការងារនឹងចុះធ្វើបទបង្ហាញលើកទី២ដោយផ្តោតលើប្រវត្តិសាស្រ្តខ្មែរក្រហម និងអតីតមន្ទីរឃុំឃាំងស‑២១។ ក្រុមការងាររៀបចំបែងចែកសិស្សជាក្រុមតូចៗដើម្បីស្រាវជ្រាវលើប្រធានបទផ្សេងៗគ្នា។
សប្តាហ៍ទី៣ សិស្សានុសិស្សទស្សនាសារមន្ទីរដោយមានការណែនាំពីមគ្គុទេសក៍។ អំឡុងពេលទស្សនាសារមន្ទីរ ក្រុមសិស្សនឹងស្រាវជ្រាវទៅតាមប្រធានបទដែលក្រុមការងារអប់រំផ្សព្វផ្សាយបានដាក់ឲ្យ។
សប្តាហ៍ទី៤ ក្រុមសិស្ស នឹងធ្វើបទបង្ហាញលទ្ធផលដែលទទួលបានពីការសិក្សាស្រាវជ្រាវទៅដល់មិត្តរួមថ្នាក់។ តាមរយៈការសិក្សានិងធ្វើបទបង្ហាញ អាចឲ្យសិស្សយល់ដឹងពីទិដ្ឋភាពទាំងស្រុងតាំងពីមុនរហូតដល់ក្រោយសម័យខ្មែរក្រហម។
៣. វគ្គបណ្តុះបណ្តាល
សារមន្ទីររៀបចំវគ្គបណ្តុះបណ្តាលលើប្រធានបទ និងជំនាញផ្សេងៗដល់ក្រុមការងារអប់រំផ្សព្វផ្សាយ សិស្សានុសិស្ស និង និស្សិតទើបបញ្ចប់ការសិក្សាដើម្បីពង្រឹងសមត្ថភាពក្នុងការអនុវត្តន៍ការងារ។ វគ្គបណ្តុះបណ្តាលទាំងនោះរួមមាន សិក្ខាសាលាស្តីពីការកសាងសមត្ថភាពមគ្គុទេសក៍សារមន្ទីរ ការសរសេរគម្រោង វិធីសាស្រ្តក្នុងការស្រាវជ្រាវ និងការប្រមូលចងក្រងប្រវត្តិសាស្រ្តតាមរយៈការសម្ភាសន៍។ នៅក្នុងឆ្នាំ២០១៦ សារមន្ទីររៀបចំវគ្គបណ្តុះបណ្តាលលើជំនាញទន់ (soft skill) មួយចំនួនដូចជា៖ ភាពជាអ្នកដឹកនាំ ការគ្រប់គ្រង និងរដ្ឋបាល។
