សារមន្ទីរឧក្រិដ្ឋកម្មប្រល័យពូជសាសន៍ទួលស្លែងរៀបចំពិធីសូត្រមន្តបង្សុកូល ដើម្បីឧទ្ទិសដល់វិញ្ញាណក្ខន្ធជនរងគ្រោះ និងចងចាំពីសោកនាដកម្មលើជនរងគ្រោះដោយសាររបបកម្ពុជាប្រជាធិបតេយ្យ។ សូមរំលឹកដែរថា “ទិវាជាតិនៃការចងចាំ ២០ ឧសភា ” គឺរំឭកដល់ថ្ងៃដែលខ្មែរក្រហមបានដាក់ចេញនូវផែនការសហករណ៍នៅតាមតំបន់រំដោះដែលខ្លួនគ្រប់គ្រង ដោយចាប់ផ្ដើមនៅថ្ងៃទី២០ ខែឧសភា ឆ្នាំ១៩៧៣ និងបានអនុវត្តទូទាំងប្រទេសនៅអំឡុងឆ្នាំ១៩៧៥-១៩៧៩។

នៅឆ្នាំ១៩៨៣ រដ្ឋាភិបាលសាធារណរដ្ឋប្រជាមានិតកម្ពុជា បានអនុម័តកំណត់យកថ្ងៃទី២០ ខែឧសភា ជា “ទិវាចងកំហឹង” ដើម្បីរំលឹកដល់ការឈឺចាប់ខ្លោចផ្សា ការថ្កោលទោសលើអំពើឧក្រិដ្ឋកម្មឃោរឃៅព្រៃផ្សៃក្នុងរបបកម្ពុជាប្រជាធិបតេយ្យ និងប្ដេជ្ញារួមគ្នាទប់ស្កាត់មិនឱ្យរបបបែបនេះកើតមានជាថ្មីម្ដងទៀត។

នៅក្នុងឆ្នាំ២០១៨ រាជរដ្ឋាភិបាលកម្ពុជាបានកំណត់ថ្ងៃទី២០ ខែឧសភា ជារៀងរាល់ឆ្នាំជា “ទិវាជាតិនៃការចងចាំ” សម្រាប់រំលឹកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ចាប់ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។

ជាពិធីបែបសាសនាប្រចាំឆ្នាំធំជាងគេបង្អស់របស់សារមន្ទីរដែលប្រព្រឹត្តទៅរយៈពេល២ថ្ងៃ និងមានការចូលរួមពីសំណាក់មន្ត្រីជាន់ខ្ពស់របស់រាជរដ្ឋាភិបាល។ បុណ្យភ្ជុំបិណ្ឌ គឺជាព្រឹត្តិការណ៍ដ៏ធំដែលរាជរដ្ឋា
ភិបាលកម្ពុជា និងក្រសួងវប្បធម៌និងវិចិត្រសិល្បៈសហការរៀបចំនៅសារមន្ទីរទួលស្លែង ដើម្បីឧទ្ទិសកុសលជូនជនរងគ្រោះនៅស-២១ និងនៅសម័យខ្មែរក្រហម។ ក្រសួងវប្បធម៌និងវិចិត្រសិល្បៈ តែងនិមន្តព្រះសង្ឃតាមចំនួនឆ្នាំដែលរបបកម្ពុជាប្រជាធិបតេយ្យដួលរល។

៧ មករា គឺជាថ្ងៃបញ្ចប់នៃសម័យខ្មែរក្រហមក្នុងឆ្នាំ ១៩៧៩ ដែលជារបបដ៏ឃោរឃៅសម្លាប់ប្រជាជនស្លូតត្រង់រាប់លាននាក់។ ជារៀងរាល់ឆ្នាំរាជរដ្ឋាភិបាល និងប្រជាជនកម្ពុជាប្រារព្ធទិវានេះ​ ដើម្បីរំលឹកដល់រណសិរ្ស​សាមគ្គី​សង្គ្រោះ​ជាតិ​កម្ពុជាដែលបានរួមគ្នារំដោះប្រជាជនកម្ពុជាពីរបបនេះជាមួយកងទ័ពស្ម័គ្រវៀតណាម។